Cerita Dane Yusup
1 Dane Yusup Kaadol Dados Panjak Ka Mesir
1
Wenten cerita sujati saking Cakepan Sucine indik anak sane dharma.
Ring negara anak Yahudi,
wenten adiri anak lanang sane mapesengan dane Yusup.
Dane Yusup puniki okan dane Israel.
Dane Israel pada mawasta Yakub.
Dane Israel madue rabi papat diri lan oka lanang roras diri.
Geginan okan-okan danene inggih punika ngangonin biri-biri,
beburon sane mesib cara kambing.
Dane Israel tresnaan kapining dane Yusup,
bandingang tekening okan danene sane lianan,
krana dane Yusup lekad tatkala dane Israel sampun lingsir.
Tur dane Israel ngaryanin jaket sane pinih luih buat dane Yusup.
Raris para semeton ipune nyingak indik bapan ipune sami tresna kapining dane Yusup.
Punika mawinan para semetonnyane gedeg kapining dane Yusup.
Kaceritayang mangkin,
dane Yusup sampun mayusa pitulas tiban.
Tandina dane Yusup nyeritayang ipian danene kapining para semetonnyane.
Ipun mabaos sapuniki,
“Ring paipian tiange,
iraga sami ring tegale.
Iraga sedek manyi gandum lan mesel-mesel gandum-gandume punika.
Laut papeselan gandum tiange ngadeg jejeg.
Tur papeselan gandum ragane sami pada bah nyembah papeselan gandum tiange.”
Kenten raos dane Yusup.
Nah,
paindikane punika ngawinang para semeton ipune ngangsan gedeg kapining dane Yusup.
Nah,
kaceritayang mangkin dane Yusup malih ngipi.
Raris ipun nyeritayang malih ipian ipune ring para semeton lan bapan ipune.
Duk punika dane Yusup mabaos sapuniki,
“Ring paipian tiange,
tiang nyingak matan ai,
bulan lan makasolas bintange nyembah tiang.”
Kenten raos dane Yusup.
Paindikane punika ngawinang bapan ipune nguelin ipun tur para semeton ipune iri ati kapining dane Yusup.
Tandina,
para semeton dane Yusup luas ngangonin kambing lan biri-biri bapan ipune sami.
Irika raris dane Israel,
nunden dane Yusup mangda luas nyingakin para semeton ipune ring pategalane.
Raris dane Yusup mamargi,
nanging ipun nenten napetang para semeton ipune ring pategalan sane biasane.
Irika raris ipun nglanturang mamargi tur ipun napetang para semeton ipune ring kota Dotan.
Kotane punika adoh pisan saking genah ipune sami.
Saking adoh para semeton ipune nyingak dane Yusup rauh,
ipun sami pada adung jagi ngamademang dane Yusup.
Nanging dane Ruben,
belin dane Yusupe sane paling kelih mapineh jagi nylametang dane Yusup.
Dane Ruben mabaos sapuniki,
“Eda ja iraga ngamademang adin iragane.
Lan ja iraga ngentungang ia di sumure ane tuh.”
Nah,
kaceritayang mangkin dane Yusup sampun rauh ring genah para semeton ipune.
Irika para semeton dane Yusup jeg ngejuk dane Yusup tur ngembus jaket ipune.
Raris ipun kapaid tur kaentungang ring sumure ane tuh.
Sasampune kenten para semeton ipune ngajeng.
Risedek ngajeng,
ipun sami pada nyingak wenten para padagang sane sedek nuju ka negara Mesir jagi ngadol raracikan wawangian.
Raris para semeton dane Yusup pada adung jagi ngadol ipun ring para padagange.
Para semeton ipune ngedeng ipun saking sumur punika tur kaadol kapining para padagange,
maaji kirang langkung tigang yuta piah inggih punika upah buruh abulan.
Raris dane Yusup kabakta ka negara Mesir.
Ritatkala punika,
belin ipune sane paling kelih nenten uning yening dane Yusup sampun kaadol.
Ipun mawali ka sumure punika jagi nulungin lan nylametang dane Yusup.
Nanging ipun napetang dane Yusup sampun nenten wenten irika.
Raris ipun nangis tur sebet pisan krana paindikane punika.
Raris ipun rauh ring para semeton sane lianan.
Irika ipun sami nampah kambing aukud tur nyelebin jaket dane Yusupe ka getih kambinge punika.
Salanturnyane okan-okan dane Israele makta jakete punika ring dane Israel,
bapan ipune sami saha mataken,
“Napike puniki jaket pianak bapa,
inggih punika Yusup?
Tiang sami manggihin jakete puniki ring margine.”
Raris dane Israel ngambil jaket punika saha nyaurin,
“Mula saja,
ene jaket pianak tiange Yusup.
Sinah ia suba kasagrep baan beburon alase.
Ia suba mati krana amaha baan beburone ento.”
Punika mawinan dane Israel kalintang sebet.
Yadiastun okan-okan danene ngibur dane,
dane nulak kaibur olih okan-okannyane.
Ritatkala punika,
para padagange sampun rauh ring negara Mesir.
Irika dane Yusup kaadol ring pengede raja Mesire inggih punika pemimpin pengawal raja Mesir.
Pengedene punika mapesengan dane Potipar.